فضفضة ^-^ (3) .. أنواع النصب ×_×

السلام عليكم
شلونكم يا حلوين؟ ^.^

أول شي.. بما أننا دخلنا في شهر ذي الحجة.. حبيت أهنئكم بهالشهر الفضيل.. الله يجعله شهر خير علينا وعليكم ^.^
وتعرفون فضل أول عشر أيام منها يعادل فضل العشر الأواخر.. فلا تنسون ذكر الله ^^
وإلي الله بيكتبله هالسنة حجّة، فالله يجعل حجه مبرور وسعيه مشكور وذنبه مغفور ^O^

ثاني شي.. أحب أشكر (ومن أعمااااق قلبي) للي يترددون على مدونتي من أول ما أنشأتها وحتى الآن..
وخاصة، في فترة خمولي أو عدم تواجدي بالنت..
يشهد الله قد أيش أفرح بمروركم أو تواجدكم أو تعليقاتكم سواء على مدوناتي أو في صندوق المحادثات أو على الإيميل أو بالمسن..

ثالث شي.. أعتتتتتذر أشد الإعتذار لعدم تواجدي في الفترة الأخيرة في المدونة، المنتديات، المسن، في النت كله!!
بس ظروووووف كثيرة صارت من العيد خربطتني خربطة وأهمها الإتصال العفن >____<"

,,,,,,,,,,,

طيب الحين، هل تسمحولي أفضفض لكم شوي؟
<< أنتي بتفضفضين بدون ما تشاورين xD

يا ناس بالله قولولي.. وش أسوي بهذا الشي إلي أسمه ((الإتصالات السعودية))؟؟؟؟!!!
أنا خلاص ما بقى فيني عقل، والسبة هم!!!! يا عالم أكاد أفقد عقلي والله!!
طبعاً كلنا نعرف أنهم نصابين، وهذا شي مسلًم فيه..
بس أنهم يزيدون نصب على النصب إلي هم فيه فهذا شي ما أدري وش أقدر أقول عنه!! ><"

أنتم تعرفون إنه عند الإتصالات الجميلة حقتنا، إنه مثلا لو طلبت السرعة 512 فهذا يعني إن السرعة راح تكون 265
هذي هي الحسبة حقتهم ×_×"
طيب وش قولكم إذا واحد مشترك من سنتين بسرعة 1 ميغا (بحسبة الإتصالات) ويدفع قيمتها طول هالمدة بالإضافة يدفع لأجور أخرى التأسيس لحد الآن!!! وبالأخير يكتشف إن السرعة أقل من 265!!!!!!!!!!!!!!!!!!!!
طال عمركم.. هذا الواحد هو أنا!! تخيلوا المشاهدة لمقطع حق دقيقتين، أقعد عليها نص ساعة!! والله بدون مبالغات، يقعد نص ساعة!! هذا والسرعة عندي 1 ميغا!!
التصفح يقعد ما بين 5 إلى 8 دقائق حتى تفتح الصفحة، وراعوا لو كان فيه فلاشات راح تزيد المدة! هذا والسرعة 1 ميغا!!
كل من جاء جرب النت عندي، جاء قالي هذا دايل آب؟؟ *_*"، أقولهم لا والله إنه دي إس أل وسرعة عالية بعد! يجون يقولون أكييييد هذا من التحميل، أقولهم والله ولا شي محملته أصلا شلون اقدر أحمل مع هالإتصال، قالو أجل أكيد المودم تعبان، رحت وبدلت المودم بكل الأنواع والسرعة ما تغيرت! قالو الجهاز حقك معفن غيريه، رحت جبت كل الأجهزة واللاب توبات وجربت عليها، والسرعة هي نفسها ما تغيرت! أتصلت على الإتصالات كل شوي أسألهم يقولون السرعة والله 1 ميغا! << ويحلفون ><"
عاد أنا طقّت براسي من كم يوم أغير السرعة وأجرب عرضهم وآخذ مودم الإتصالات نفسه، لعل وعسى يمكن يطلع فايدة.
وأتصلت عليهم وطلبت الخدمة وبعد كم يوم جانا المهندس وقعد يشيّك.. بس فتّح عيونه بأقوى ما عنده قال الحين أنتم كم سرعتكم الي عندكم من الأول؟ قلتله والله الي عندنا 1 ميغا، قالنا تمزحوووووون؟؟ الي عندكم ترى 265!! عاد أنا صرت بحالة صدمة
قال إذا مو مصدقين شوفو بعيونكم.. وطلعلنا ذاك الجهاز العجيب وقاس السرعة، إلا والله السرعة 230، شوي تزيد وشوي تنقص بعد!!
تخيلوا حتى ما جات 265!!!!!!!!
حتى المهندس نفسه قال حسبي الله عليهم الظالمين كيف سوو فيكم كذا؟؟ (وهو مهندس منهم ترى)..
وهو قالنا أصلا: شوفوا.. ترى الموضوع كله نصب بنصب، جايز يعطونكم سرعة أقل من 50 كيلوبايت ويقدرون يعطونكم 10 ميغا لو يبون بعد..

=====================

أنا إلى هنا وبس.. خلاص ما أدري وش أسوي فيهم.. اصلا يكفي أنه مخترب عندي من أيام عيد الفطر، وطول هذيك الفترة شابكة من الجيران ><"
قولولي وش أسوي؟؟ أشتكيهم وأرفع عليهم قضية؟؟ بس من يسمعلي؟؟؟
أدعي عليهم؟؟ أتوقع مافي مخلوق تعامل معهم إلا ودعى عليهم كل أنواع الدعاوي ><"
أقاطع النت؟؟ يعني مثلاً نسوي كلنا حملة مقاطعة النت ونسوي مظاهرة على الإتصالات؟ لا صعبة نستغني عن النت!! *_*
طيب أستسلم للأمر الواقع وارضى بنصبهم لي، وكل من في السعودية أيضا يتعامل معهم ويرضى رغم أنه يعرف مقدار نصبهم وغشهم!!

أنا على ثقة أكيدة بأن فيه ناس كثيييييييييير غيري تم النصب عليهم مثلي أو على أكثر بعد!!

وش نقدر نقول بس غير (حسبي الله ونعم الوكيل!)