فضفضة ^-^ (4) .. كل عام وجدة موطن القذارة والمستنقعات xD

السلام عليكم ورحمة الله وبركاته

خخخ.. مع إننا اليوم هو ثالث أيام عيد الأضحى المبارك إلا إني لحد الآن ما باركت لكم فيه ^^"

كل عام وأنتم بألف خير.. أعاده الله علينا وعليكم باليمن والبركات

...

بصراحة وعشان أكون صادقة معكم، هذي المرة ما حسيت بالعيد أبداً وكأنه يوم عااااااادي جداً! ×_×

لأن الظروف إلي حاطت فيني هذي اليومين ما ساعدتني على أني أحس بإحساس العيد ^^"

تخيلوا صبح العيد كنا معيدين بالمطار XDD

آه، صح نسيت أقولكم ليش حنا بالمطار .. أول شي حنا قبل العيد بأسبوع تقريباً سافرنا للمنطقة الشرقية

كانت هذي هي رحلتي الأولى لها، وسعادتي كانت غاااامرة ^.^

تمشينا فيها على الدمام والخبر وبالغلط دخلنا على سيهات xD..

بس تحس إن المنطقة الشرقية كلها بأكملها بما في ذلك الضواحي والقرى أيضاً، بحجم مدينة جدة، لأن فعلاً مدنها جداً صغيرة مقارنة بجدة أو الرياض

بالمناسبة أنا من سكان جدة للي ما يعرفون هذا الشي

بحرها كان رااااائع يهبل، لا مجال للمقارنة بين بحر الشرقية وبين بحر جدة ×_×

بحر الشرقية كان مختلف من نواحي كثيرة عن بحر جدة.. من حيث النظافة والترتيب ورائحته تحسها مشبعة باليود

بينما بحر جدة في قمة القذارة والوسخ والعفن وجميع أنواع الصراصير والفئران والجراذي تتقافز هناك بدلاً من الأسماك أما رائحته فحالياً هو معدوم الرائحة ولكن أحياناً تشم رائحة المجاري XD

وبشكل عام المنطقة الشرقية مدنها هادية والبلدية معتنية فيها بشكل وااااضح على نقيضها مدينة جدة.. يعني لا تعليق  ×_×

بيني وبينكم.. بديت أستحي والله أقول إني أسكن بجدة << هجووووم يا أهل جدة عليها xD

أهم ما في الموضوع إني غيرنا جو والأهم عرفت ما هي الشرقية، لأني بصراحة ما أعرف شي عنها ^^"

عاد بينما نحن هناك وصلتنا الأخبار من أهلنا ومعارفنا إلي هناك عن فيضانات جدة.. أكيد الكل يعرف عنها من الأخبار ><"

جدة كلها صايرة مستنقعات عملاقة.. وهذا كله لأن بلديتنا خايسة مو مهتمين ولا هم مسوين صرف صحي..

لو أهتموا شوووية مثل باقي الخلق، ما كان وصل عدد الوفيات المئة، ولا ما كان صارت هذي الحوادث ولما تهدمت الجسور >.<"

في الواقع، الحي إلي حنا في مو من الأحياء المتضررة، ولكن بما أنك بجدة فأكيد راح توصلك أضرار في حال سقوط الأمطار ><"

وبيتنا إنفجرت فيه ماسورة إلي توصل السطح على الحوش، وغرقت بيتنا تغريق.. وغرفتي عاد صارت مسبح حتى المودم كان يسبح فيها XDD

وعاد جاء يوم العيد وإضطرينا نعيد بالمطار، لأن كانت عودتنا لجدة الحبيبة بصباح العيد

ويوم ركبنا الطيارة كانت المضيفة الفلبينية شوي وتصفقنا بالعربية الي تدفها، نفسها واصلة لخشمها XDD << وش دخل هذا بالسالفة

يوم رجعنا البيت أشوا أختي الكبيرة والشغالة ما قصرو نظفوا البيت تنظيف.. والي مستغربة منه إن اللاب والهاردسكات والمودم ماشاء الله تبارك الرحمن شغالين مافيهم شي ولا كأنهم تغرقوا بالماء

أحمم.. وبس، كان هذا كل شي عن عيدي

إن شالله يكون عيدكم أنتم أفضل بكثير من عيدي

مواقع لتحويل الكتابة اليابانية والكورية إلى لاتينية (Romanization)

السلام عليكم ^.^

نحن دائما نشوف كلمات يابانية أو كورية مكتوبة بحروف إنكليزية

وهذا الشي سهل علينا كثييييير في فهم ومعرفة هذي اللغتين بشكل خاصة ^.^

مصطلح "Romaja" للكوري أو"Romaji" للياباني، وهو يعني الكتابة بالأحرف اللاتينية،

أو مثل ما يقولون ترجمة الأحرف إلى اللاتينية.. وأصل المصطلح "romanization".

ولكن أحياناً نشوف كتابات يابانية وكورية بأشكالها الأصلية، ومو عارفين كيف نقدر نقرأها على الأقل..

فلذلك حبيت أستعرض لكم مواقع تساعدكم بإذن الله في تحويل أحرف الكتابة اليابانية والكورية إلى أحرف لاتينية.

كل إلي عليكم تسوونه هو تلصقون النص، وتختارون أمر التحويل..

طبعاً يختلف هذا الشي من موقع لآخر لأن فيه بعض المواقع فيها خيارات أكثر..

وللمعلومية.. التحويل لن يكون دقيق 100%، ولكنه يفي بالغرض إلى حد كبير.

،،،،،،،

Romanization of Korean

التحويل إلى الكوري

http://www.kawa.net/works/ajax/romanize/hangul-e.html

موقع آخر

http://www.thelapan.com/h2k/?pid=tr&sec=1

×××

Romanization of Japanese

التحويل إلى الياباني

هذا نفس الموقع حق الكوري الي فوق

http://www.kawa.net/works/ajax/romanize/japanese-e.html

موقع آخر (جداً رائع ^.^)

http://www.romaji.org/

،،،،،،،

إن شاء الله يكون عجبتكم =)

فضفضة ^-^ (3) .. أنواع النصب ×_×

السلام عليكم
شلونكم يا حلوين؟ ^.^

أول شي.. بما أننا دخلنا في شهر ذي الحجة.. حبيت أهنئكم بهالشهر الفضيل.. الله يجعله شهر خير علينا وعليكم ^.^
وتعرفون فضل أول عشر أيام منها يعادل فضل العشر الأواخر.. فلا تنسون ذكر الله ^^
وإلي الله بيكتبله هالسنة حجّة، فالله يجعل حجه مبرور وسعيه مشكور وذنبه مغفور ^O^

ثاني شي.. أحب أشكر (ومن أعمااااق قلبي) للي يترددون على مدونتي من أول ما أنشأتها وحتى الآن..
وخاصة، في فترة خمولي أو عدم تواجدي بالنت..
يشهد الله قد أيش أفرح بمروركم أو تواجدكم أو تعليقاتكم سواء على مدوناتي أو في صندوق المحادثات أو على الإيميل أو بالمسن..

ثالث شي.. أعتتتتتذر أشد الإعتذار لعدم تواجدي في الفترة الأخيرة في المدونة، المنتديات، المسن، في النت كله!!
بس ظروووووف كثيرة صارت من العيد خربطتني خربطة وأهمها الإتصال العفن >____<"

,,,,,,,,,,,

طيب الحين، هل تسمحولي أفضفض لكم شوي؟
<< أنتي بتفضفضين بدون ما تشاورين xD

يا ناس بالله قولولي.. وش أسوي بهذا الشي إلي أسمه ((الإتصالات السعودية))؟؟؟؟!!!
أنا خلاص ما بقى فيني عقل، والسبة هم!!!! يا عالم أكاد أفقد عقلي والله!!
طبعاً كلنا نعرف أنهم نصابين، وهذا شي مسلًم فيه..
بس أنهم يزيدون نصب على النصب إلي هم فيه فهذا شي ما أدري وش أقدر أقول عنه!! ><"

أنتم تعرفون إنه عند الإتصالات الجميلة حقتنا، إنه مثلا لو طلبت السرعة 512 فهذا يعني إن السرعة راح تكون 265
هذي هي الحسبة حقتهم ×_×"
طيب وش قولكم إذا واحد مشترك من سنتين بسرعة 1 ميغا (بحسبة الإتصالات) ويدفع قيمتها طول هالمدة بالإضافة يدفع لأجور أخرى التأسيس لحد الآن!!! وبالأخير يكتشف إن السرعة أقل من 265!!!!!!!!!!!!!!!!!!!!
طال عمركم.. هذا الواحد هو أنا!! تخيلوا المشاهدة لمقطع حق دقيقتين، أقعد عليها نص ساعة!! والله بدون مبالغات، يقعد نص ساعة!! هذا والسرعة عندي 1 ميغا!!
التصفح يقعد ما بين 5 إلى 8 دقائق حتى تفتح الصفحة، وراعوا لو كان فيه فلاشات راح تزيد المدة! هذا والسرعة 1 ميغا!!
كل من جاء جرب النت عندي، جاء قالي هذا دايل آب؟؟ *_*"، أقولهم لا والله إنه دي إس أل وسرعة عالية بعد! يجون يقولون أكييييد هذا من التحميل، أقولهم والله ولا شي محملته أصلا شلون اقدر أحمل مع هالإتصال، قالو أجل أكيد المودم تعبان، رحت وبدلت المودم بكل الأنواع والسرعة ما تغيرت! قالو الجهاز حقك معفن غيريه، رحت جبت كل الأجهزة واللاب توبات وجربت عليها، والسرعة هي نفسها ما تغيرت! أتصلت على الإتصالات كل شوي أسألهم يقولون السرعة والله 1 ميغا! << ويحلفون ><"
عاد أنا طقّت براسي من كم يوم أغير السرعة وأجرب عرضهم وآخذ مودم الإتصالات نفسه، لعل وعسى يمكن يطلع فايدة.
وأتصلت عليهم وطلبت الخدمة وبعد كم يوم جانا المهندس وقعد يشيّك.. بس فتّح عيونه بأقوى ما عنده قال الحين أنتم كم سرعتكم الي عندكم من الأول؟ قلتله والله الي عندنا 1 ميغا، قالنا تمزحوووووون؟؟ الي عندكم ترى 265!! عاد أنا صرت بحالة صدمة
قال إذا مو مصدقين شوفو بعيونكم.. وطلعلنا ذاك الجهاز العجيب وقاس السرعة، إلا والله السرعة 230، شوي تزيد وشوي تنقص بعد!!
تخيلوا حتى ما جات 265!!!!!!!!
حتى المهندس نفسه قال حسبي الله عليهم الظالمين كيف سوو فيكم كذا؟؟ (وهو مهندس منهم ترى)..
وهو قالنا أصلا: شوفوا.. ترى الموضوع كله نصب بنصب، جايز يعطونكم سرعة أقل من 50 كيلوبايت ويقدرون يعطونكم 10 ميغا لو يبون بعد..

=====================

أنا إلى هنا وبس.. خلاص ما أدري وش أسوي فيهم.. اصلا يكفي أنه مخترب عندي من أيام عيد الفطر، وطول هذيك الفترة شابكة من الجيران ><"
قولولي وش أسوي؟؟ أشتكيهم وأرفع عليهم قضية؟؟ بس من يسمعلي؟؟؟
أدعي عليهم؟؟ أتوقع مافي مخلوق تعامل معهم إلا ودعى عليهم كل أنواع الدعاوي ><"
أقاطع النت؟؟ يعني مثلاً نسوي كلنا حملة مقاطعة النت ونسوي مظاهرة على الإتصالات؟ لا صعبة نستغني عن النت!! *_*
طيب أستسلم للأمر الواقع وارضى بنصبهم لي، وكل من في السعودية أيضا يتعامل معهم ويرضى رغم أنه يعرف مقدار نصبهم وغشهم!!

أنا على ثقة أكيدة بأن فيه ناس كثيييييييييير غيري تم النصب عليهم مثلي أو على أكثر بعد!!

وش نقدر نقول بس غير (حسبي الله ونعم الوكيل!)